【港超專版】情人節豈只為愛情　謝朗軒22的啟示

2月14日--有伴侶的，忙著籌備如何令另一半過個難忘的節日，沒有伴侶的，忙著躲避接二連三的「閃光彈攻擊」，情人節真是個讓人又愛又恨的節日。正為情人節而惆悵的你，看畢這篇關於東方龍獅後衞謝朗軒的專訪，可能令你有所啟發。 圖/文:陳焌鏗

一年365日，情侶之間總有著不同的紀念日，但總有一兩個大日子，深深地烙印在你的心中：「其實揀22號一嚟係因為Lucky number之外，上季喺理文轉著22號之後，其實自己表現係進步咗好多。二嚟就係揀22號其實係因為女朋友同爸爸嘅生日，呢個號碼除咗代表有女朋友嘅支持之外，亦都想踢波畀爸爸睇，因為佢細個都好鍾意踢波，但係以前職業足球嘅發展唔係咁好，佢隻字不提，唔會鼓勵我去踢波。但係佢知我踢職業之後，我係感受到佢好支持我去踢波。即使我返學，佢冇乜叫我畀心機讀書，反而我每場比賽佢都會出席。」「謝朗」細說著。

有時候，我們為了討好伴侶，會把家人拋諸腦後。訪問當日，「謝朗」提得最多，不是女朋友，便是爸爸：「爸爸之前幾季嚟睇，我都有得踢，今季出場機會少咗，佢每次比賽之前都會問我：『嚟緊呢場有冇得出呀？』。我每次都係答佢：『唔知』。我好想去爭取更多機會去踢波畀佢睇，就算好多時佢知我冇出場機會，都會入場睇，睇下我有冇機會有名咁。之前作客廣州都未知我有冇名，但係佢都上廣州去支持我比賽。」聞說女生們都喜歡男生孝順、顧家，難怪「謝朗」早就獲得「封盤」！

選擇伴侶，有的人追求外貌、有的人追求性格、有的人追求功能，但他們都忽略了一件最重要的事——同步。「嚟緊呀？都可以透露下嘅，我哋已經計畫咗，應該會去土耳其。我哋主要都係去啲風景靚嘅地方為主，大家性格好似，自己喺揀旅行地點嘅時候會覺得東南亞嘅地方都係食下嘢、買下嘢，反而我哋覺得呢啲嘢香港大部分都買到，所以就想去睇下世界、感受世界多過去到其他國家淨係食嘢。」「謝朗」笑說。

在回歸東方龍獅後，「謝朗」的首場比賽是去年10月初，對陣夢想FC的比賽。該仗「謝朗」後備登場並射入一球，但他未有自滿，還謙稱：「自己落場之前都會同自己講：『一係有助攻，一係有入波』，呢樣係我每次落場畀自己嘅目標。返嚟第一場上陣對夢想嘅時候，開波前都有同阿孝（曾至孝）講：『今場我入波！』人哋睇會以為我玩下啫、講笑，但其實我個心係好認真咁諗，落到場嘅時候好想把握每一個機會去入波。對夢想嗰場，雖然自己入到一個波，但係個表現自己係唔滿意。我覺得唔可以用一個入球去掩蓋自己嘅不足，自己完場嗰陣諗，嗰場係起碼要入到兩球波，因為已經有3次起腳機會，而且次次都係對住龍門，呢樣嘢係自己需要改善，所以我對於自己現時嘅入波同助攻嘅數字都係唔滿意。」

謝朗軒資多啲

出生日期：1995年2月6日

身高：1米73

體重：63公斤

位置：右後衞，右中場

曾效力球隊：黃大仙、夢想駿其、理文流浪、理文

現效力球隊：東方龍獅

球衣號碼：22