熱刺增強火力！睇中前利物浦球星
20190216
東網電視
更多新聞短片
（互聯網）
熱刺因為要起新球場，所以剛過去嘅兩個轉會窗，都冇簽入任何球員，唔少熱迷都非常失望。好彩陣中一眾攻擊手都爭氣，哈利卡尼、迪利阿里都極具侵略性，近期佢兩個都受傷，就有南韓球星孫興民挺身而出，近期瘋狂入波，帶領球隊於各項賽事4連勝。
熱刺球員係有質素，不過領隊普捷天奴必然希望簽入更多球員加強實力，英國《每日鏡報》就爆球隊將於今夏收購AC米蘭進攻中場蘇素。呢名西班牙好波之人，本季於各項賽事上陣26場，攻入6球貢獻8次助攻，佢又可以踢埋右翼，的確好使好用。呢名25歲攻擊手同A米仲有3年約，不過其合約中列明解約金，邊隊出3500萬鎊就可以成功收購。
蘇素曾踢過利物浦，於2012年首次為紅軍出場，15年先轉投A米。除熱刺外，據報阿仙奴領隊艾美利亦對佢欣賞有加，不過熱刺比兵工廠對蘇素更具誠意。
支持本地運動齊去「睇體」！
東網體育FB同你追實體壇每個精彩時刻！