【有片】女友情婦同日生B 渣男球星點收科？
20190217
東網電視
更多新聞短片
齊人之福唔易享！效力貝爾格萊德紅星嘅荷蘭中場伊比斯利奧，近日爆出一單勁爆「桃花劫」，事關佢一腳踏兩船之餘，女友同情婦竟然喺同一日生BB。俄羅斯法院已下令伊比斯利奧喺今個月23號前提交DNA證明，睇下係咪真係「一箭雙鵰」！
現年27歲嘅伊比斯利奧係前荷蘭U21國腳，今季代表紅星出戰歐聯，但係佢感情生活就相當混亂，據報佢之前效力安治(2015年至2017年)嗰陣，認識靚女模特兒Anna Bagajeva兼拍拖，但Anna當時唔知伊比斯利奧原來已經有個正牌女友Daria Danilina，更加估唔到係兩位女士竟然喺2017年1月17日同一日生BB。
伊比斯利奧已經承認Daria所生嘅囝囝馬迪奧係自己骨肉，但就拒絕承認係Anna所生BB嘅爸爸，而且至今一毫子贍養費都冇畀過Anna。上年5月，兩位女士齊齊上俄羅斯一個電視台節目爆大鑊，根據兩個BB嘅DNA檢驗，顯示有90%可能性係同一個爸爸。Anna事後向俄羅斯法院申訴，最近法院就勒令伊比斯利奧喺23號前提交DNA報告，否則就會判佢係BB嘅爸爸。
支持本地運動員，一齊去「睇體」！
東網體育FB同你追實體壇每個精彩時刻！