利物浦有利因素！拜仁呢件停賽影響極大
20190220
東網電視
更多新聞短片
利物浦歐聯16強主場0比0打和拜仁慕尼黑，次回合作客德國稍佔上風，其實「紅軍」今場仲得到一個極好消息，就係拜仁慕尼黑右閘甘美治喺次回合要停賽，佢嘅缺陣絕對影響極大！
甘美治今場早段就拎黃牌，亦係佢今屆歐聯第3張黃牌，意味次回合將會停賽，佢嘅位置會由巴西老將拿菲爾頂上。雖然拿菲爾經驗豐富，同活力同助攻力就完全唔係甘美治嗰皮，睇番今季5大聯賽嘅助攻王，甘美治就以10次助攻並列第1位，另外2個係邊個？咪就係美斯同夏薩特囉！
冇咗甘美治嘅助攻，拜仁慕尼黑鋒力當堂弱咗一截，王牌射手羅拔利雲度夫斯基今季24個入波之中，有7球係由甘美治助攻，即係差唔多30%！依家甘美治要停賽，利物浦梗係放下心頭大石啦！
東網體育FB同你追實體壇每個精彩時刻！
支持本地運動員，一齊去「睇體」！