【雙紅會】基尼開淫P吸笑氣 難怪高普唔要你
20190224
東網電視
更多新聞短片
利物浦近期後防受到傷患問題困擾，唔少球迷認為領隊高普1月借走右閘尼達利基尼係錯誤決定，不過呢位英格蘭國腳嘅品格到操守就受到唔少質疑，英國《太陽報》踢爆尼達利基尼早前重金搞咗個淫亂派對，飲酒吸笑氣之餘，仲同至少2個夜店新相識嘅女仔上床！
據報呢個淫亂派對係今個月初舉行，當時佢效力嘅般尼茅夫作客利物浦慘吞3蛋，佢受到「外借球員唔可以倒戈」條例缺陣，所以就有時間喺西班牙馬爾韋利亞籌備呢個「淫P」。派對入面一共有8個女仔，年紀最細2個只得16歲同17歲，網上模特兒Estelle亦係其中之一，尼達利基尼同時請咗7個好友出席，實行8男8女大玩特玩。
消息人士透露，成班人不斷食嘢、飲酒、轉場再飲，成個周末不斷重複咁做，尼達利基尼先係同其中一個女仔上床，但之後又睇中另一個，第二晚又搞埋一齊，報道指2個女仔都係尼達利基尼2個月前喺夜店認識，相信全部獲邀出席嘅女仔都有類似經歷。由網上流出嘅派對相片所見，尼達利基尼曾經拎住個裝笑氣嘅罐，又飲咗大量烈酒，認真唔識自愛。
事實上，尼達利基尼出晒名爛滾，上年7月嗰陣，佢個大肚女朋友Kelci就因為忍受唔到基尼成日偷食而分手，Kelci試過喺屋企嘅CCTV見到，基尼同其他女人喺按摩池入面「搞嘢」，連女朋友都頂佢唔順，試問著重紀律嘅高普又點會忍受呀？
東網體育FB同你追實體壇每個精彩時刻！
支持本地運動員，一齊去「睇體」！