咪葡萄！反骨仔高圖爾斯有名模新歡姊弟戀
20190227
東網電視
更多新聞短片
(互聯網)
近排形象勁插水嘅皇家馬德里門神泰拔高圖爾斯，趁住周中西班牙盃唔使擔正，似乎又有機會可以抽空陪佢個新名模女友喎！事關西班牙八卦雜誌影到26歲佢近排同西班牙32歲靚女主播卡妮露密會開餐，拍住拖去食日式料理，唔通佢愈反骨就愈有運行？
身為比利時國家隊門將嘅泰拔高圖爾斯，由早年離開母會馬體會開始，到過檔車路士，以至依家去到效力皇馬，佢最鍾意就係用把「臭口」講前東家是非，搞到形象持續插水，近排更係跌入新低點。不過，你有你鬧，佢有佢行運，依家去到「銀河艦隊」仲搶埋基羅拿華斯正選，球員生涯成就不斷創新高。
感情方面，高圖爾斯都算係賤男一族，2014年試過偷食國家隊隊友奇雲迪布尼女友，搞到幾乎畀比利時國家隊踢走，好彩之後迪布尼幫佢求情先冇事。到2017年4月，高圖爾斯又同當時陀住佢第2個BB已經8個月嘅女友瑪達杜明高斯和平分手，之後就聲稱冇再拍拖。
至於今次同佢扯上關係嘅卡尼露，係模特兒兼電視節目主持，之前同過至少3個運動員拍拖，又係感情生涯混亂一族，今次佢同高圖爾斯撻着，真係夾到震喎。
支持本地運動員，一齊去「睇體」！
東網體育FB同你追實體壇每個精彩時刻！