东网电视
更多新闻短片
(Getty Images)
力奇细个睇波听桂神讲波，12码一系入，一系唔入，冇其他可能。不过依家我睇住曼联喺比赛获判12码，除咗谂起入同唔入，就只系谂到快啲换刽子手。寻晚曼联喺主场对住修咸顿，最终险胜3比2，场波去到补时阶段，“福仔”拉舒福特搏到12码，由常规刽子手保罗普巴操刀，结果佢又玩招牌婆仔碎步，再突然加速起脚，点知就畀对手门将只脚挡出，错过锁定胜局机会，好彩之后“圣人”都冇入波，唔系无情情畀人追番失分，都咪话唔阴功。
睇番保罗普巴今季主射12码纪录，原来呢球已经系佢今季第3次射失，之前2次分别系英超第4轮作客般尼，普巴射失都赢2比0。仲有系第10轮主场斗爱华顿，普巴又系同样射法出事被救出，好彩场波都赢2比1。冇错，呢位法国球星3次射失，球队都冇失分，但幸福唔系必然，唔通真系等到佢宴客累失分先更换刽子手咩？
呢场波赛后，已经变咗讲波佬嘅加利佬闹爆普巴，话佢锺意射12码当做骚，玩嘢累全家。之但系家阵红到爆嘅看守领队苏斯克查就话：“我即场叫咗佢准备下次再射呀！我冇谂住换刽子手，我以前都射失过，但佢系个充满信心嘅孩子，佢想射咪射啰，我哋就系需要呢类球员。今次只系唔好彩，佢平时都入，所以我相信佢将来唔会有问题。”
其实以前连摩连奴都讲过，欣赏普巴嗰份超强自信，所以先将刽子手资格交畀普巴。不过作为“红魔迷”，力奇最关心都系成绩，对于12码最想系有保证，正所谓数据唔呃人，踢咗3分2球季，普巴已经射失3球12码，系咪真系全队都搵唔到个有信心又射得之人？“福仔”？卢卡古又点睇先？
支持本地运动员，一齐去“睇体”！
东网体育FB同你追实体坛每个精彩时刻！
