利物浦唔識射賴風太猛 高普原來有苦衷
利物浦未能攻破愛華頓，球隊表現似有跌Watt現象，主帥高普賽後總結今仗，佢得出一個結論，就係現場「風太猛」！我哋細細就識，當賴到冇嘢好賴，就會「賴地硬」同「賴風猛」，估唔到呢啲生活智慧，竟然畀高普借用。
高普表示：「今場還好，一場硬仗，失分有好多原因，包括現場風勢。」佢繼續話：「我知咁講好多人唔鍾意，但今場比賽吹住冇定向風，風勢從四方八面而來，令雙方球員都遇到唔少困難。」
球隊演出方面，高普稱：「我哋創造咗3至4個必入球機會，可惜穆罕默德沙拿同法賓奴泰華利斯把握唔到，還好我哋都冇輸波，下場返主場鬥般尼又會係另一場硬仗，要繼續拚鬥。」
其實高普不只一次將球賽失利歸咎於天氣及場地等因素，有球迷將高普嘅做法解讀為幫球隊降壓，唔想講出球員表現回落嘅嘢，以免打擊士氣。
支持本地運動齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！