勇呀！簡東拿巴黎單挑尼馬父子
20190310
東網電視
更多新聞短片
(互聯網)
曼聯周中喺歐聯戲劇性擊敗巴黎聖日耳門，總比數反勝晉級，場波固然打得夠激，其實球場之外都一樣好睇！話說有份入場嘅「奧脫福大帝」簡東拿都係今場VIP廂房座上客，有傳媒就爆料，話賽後同簡東拿坐埋一齊嘅一位老友，就相當激動向住由尼馬父子坐嘅廂房做出挑釁性手勢，雖然當時尼馬已經走人，去咗PSG個更衣室安慰隊友，但留喺廂房嘅老尼馬據聞就相當勞嘈，諗住過去同簡東拿班人開拖。事件最後要勞動現場保安阻擋分隔兩邊人，先冇搞出大頭佛。
不過，一向好火嘅簡東拿，賽後就未肯收手，仲喺個人IG上載住一張有尼馬同燒腸仔嘅相，同時寫住：「就好似BBQ咁，當春天嚟到，陽光普照之時，你梗係拎佢出嚟燒啦！」究竟「簡大帝」講緊乜？見仁見智，有英國傳媒就理解為簡東拿寸尼馬只係個普普通通，只係一時一時有料嘅球員，唯一肯定，應該唔慌係好嘢，只會係寸爆尼馬說話囉！
支持本地運動員，一齊去「睇體」！
東網體育FB同你追實體壇每個精彩時刻！