【歐聯8強】有晒劇本 蘇B重演絕殺好戲
20190316
東網電視
更多新聞短片
(Getty Images)
曼聯喺歐聯8強抽中對巴塞隆拿，被指係下下籤，皆因紅魔鬼於歐聯史上8次對巴塞，僅獲得1勝4和3負。不過曼聯今次有「蘇B元素」，情況又唔同。
蘇斯克查只係做看守領隊，竟然可以令曼聯重生，甚至喺絕對劣勢之下，歐聯16強次回合作客擊敗巴黎聖日耳門，晉級8強，更加係「奇蹟之戰」。
曼聯抽中對巴塞，似乎上天注定蘇斯克查又可以再次表演，曼聯8強首回合先主場，次回合作客，換言之到訪魯營球場，將會係雙方生死一戰。
1999年歐聯決賽就係喺魯營球場舉行，當年曼聯大部分時間落後拜仁慕尼黑0:1，戰至補時1分鐘由舒寧咸入波扳平，去到補時3分鐘再入蘇斯克查建功反勝2:1。
魯營球場變成曼聯及蘇斯克查嘅福地，似乎已經有晒劇本，大家等睇紅魔鬼同蘇B再次泡製1場逆轉勝。
東網體育FB同你追實體壇每個精彩時刻！
Follow東網體育IG一齊撐本地運動員！