情慾短訊曝光　入一球咬一下屁股

祖雲達斯球星C朗喺球場上射門腳腳七注，進攻威力驚人，佢喺場外表現亦「好進取」，1位名為Alexandra Mendez嘅委內瑞拉模特兒上秘魯電視台爆料，指C朗曾經向佢發出情慾短訊，提出「變態要求」，話自己每入1球後，希望可以咬Alexandra屁股一下。

Alexandra Mendez話C朗透過社交網Instagram主動搭訕，之後兩人交換電話號碼，聯絡更加頻密。Alexandra話佢兩個係喺C朗效力皇馬時期開始交往，C朗有次WhatsApp佢，上面仲有張文迪絲着比堅尼騷籮柚嘅性感相，C朗當時問佢個籮柚「係咪堅嘢？畀我檢查一下」，跟手仲話以後希望每入一球，都可以咬Alexandra個肉臀一啖。咁計法，如果Alexandra呢兩日如果唔係喺南美，歐聯賽後就可能會畀C朗噬咗3嘢，認真變態。

Alexandra今次帶埋手機上ATV電視台個節目，展示同C朗嘅WhatsApp對話內容，呢個情慾短訊已經係3年前，當時C朗仲效力緊皇馬。

Alexandra仲話曾經同C朗面對面傾偈，但並冇答應C朗要求，保住屁股不失。咁又係嘅，C朗入咁多波，如果接受佢要求，Alexandra真係屁股開花。

雖然Alexandra唔肯講兩人有冇上過床，不過佢話自己識C朗嗰陣，唔單只經常收到呢個葡萄牙前鋒送嘅波飛，可以入巴拿貝睇歐聯，而且C朗當時都仲未搭上喬治娜，講起喬治娜後來幫C朗生咗個女Martina，Alexandra開玩笑話：「我本可以成為嗰個懷孕嘅人。」

喺Instagram有成50萬追隨者嘅Alexandra，仲有同去咗意甲嘅C朗聯絡，呢段「友誼」以後有冇下文，大家就要放長雙眼嘞。

東網體育FB同你追實體壇每個精彩時刻！

http://bit.ly/2ecTF2A　

Follow東網體育IG一齊撐本地運動員！

http://bit.ly/2EYxoRh