【日職】「零食爭議」櫻花撼紅鑽前失「戀」

20190316
東網電視
更多新聞短片
彩報日職、日乙最強大資料庫,即去睇:https://bit.ly/2U0kUjq 
搶錢都要經一經大腦,否則就會學似日職大阪櫻花咁臨埋牙至失「戀」,而且成為箭靶!
呢幾日猛谷星期日(17號)對浦和紅鑽場大戰嘅櫻花,最近就前個星期五(8日)宣布推出「櫻花之戀人」(セレッソの恋人)餅乾,準備翌日主場對廣島三箭嗰陣面世賺啲使費,點知消息公布唔夠幾粒鐘,就喺晚上9點話中止售賣,原來牽涉到產品模仿,以至都倉賢轉會引發嘅仇恨,被迫臨時縮沙,後尾仲以0比1輸埋畀廣島三箭,面同錢都輸晒!
櫻花今次確係有啲捉蟲,事關「櫻花之戀人」嘅兩種餅,包括曲奇同langue de chat夾心餅乾,都係賣800日圓(約56.5港元),除咗產品個名令人有錯覺,真係幾似港人熟悉嘅「白色戀人」(白い恋人),點睇都有侵權爭生意嫌疑。其實「白色戀人」嘅生產商石屋製果,早喺2013年曾就吉本興業推出嘅「有趣的戀人」(面白い恋人),觸發法律訴訟,石屋製果入稟向對方索償產品年銷售額嘅兩成,約莫1.2億日圓(約847.1萬港元),結果後者連包裝設計都改埋至達成和解。
至弊係石屋製果正正係北海道札幌岡薩多個頭號贊助商,2018年冬櫻花出手撬走札幌王牌射手都倉賢,已經觸怒咗唔少北海道粉絲,依家連人哋個幕後金主都搞埋,點會冇麻煩吖!櫻花官網事後解釋話販賣權冇問題,只不過收集咗球迷意見之後,先至終止推出產品喎,由此就知道佢哋一定係畀人插到開花。
眾所周知,日本球會嘅3大經濟支柱,就係廣告、門票同商品銷售。櫻花即使都係老牌球會,但喺商品銷售方面就比唔上其他豪門,甚至只得同城宿敵飛腳嘅3分2。以公布咗嘅數字嚟講,2017年櫻花商品銷售額係3.68億日圓(約2595.8萬港元),比起今仗對手浦和嘅8.13億日圓(約5734.7萬港元)少成一半有多,所以佢哋好努力想出多啲產品開發市場。
跟紅頂白,邊樣賣得搞邊樣唔係錯,問題係櫻花進取得有些少亂嚟,今次失「戀」事件係一個,有日本網民翻舊賬,爆佢哋以前都試過推出一款用咗飛腳主色嘅針織頸巾,明顯市務部班人冇用過個腦諗嘢。
東網體育FB同你追實體壇每個精彩時刻!
支持本地運動員,一齊去「睇體」!