港超聯 贏波功臣李家豪:好驚喜!好意外!

2019年03月16日 20:19
東網電視
更多新聞短片
最威係你啦!  (陳焌鏗攝)

「中銀人壽香港超級聯賽」周六(16日)於旺角大球場上演香港飛馬大戰和富大埔,客軍最終憑李家豪射入罰球,以2比1反勝對手。入球功臣李家豪賽後大嘆:「好驚喜!好意外!我哋上半場踢落去都知道好攰,飛馬嘅攻勢好入肉,我哋落後一球返更衣室。下半場我哋咬埋啖氣,搶番啲攻勢,去到罰球嗰下,自己好有信心去射,入咗都好意外、好驚喜。」

早前曾經歷過官司、闊別職業足球接近兩季的他坦言:「有得返嚟踢番好開心,尤其是大埔,因為我自己都係大埔人,返番去細細個啱啱開始踢波嗰個地方,代表大埔個感覺好大,比踢任何球隊更加大!」他又指:「季前冇預期自己可以Keep住有正選踢,始終我停咗兩年,都係諗住攞番狀態。依家係超乎我預期,好開心球隊可以打到入亞協分組賽,聯賽又有得爭冠軍,都好希望代表著大埔攞冠軍!」

球隊目前需兼顧聯賽、足總盃和亞協盃分組賽,他自信球隊能越過每個難關:「我相信經歷完呢兩個禮拜,我哋會有支強心針,之後比賽都係咁嘅情況,既然呢兩個禮拜我哋都應付到,我相信我哋可以捱到之後嘅比賽。」

人生不但充滿高低,還有許多選擇,問到「家豪」最希望哪條戰線取得好成績時,他明言:「我會揀聯賽,因為始終我哋跟著『堅Sir』由細到大都係講緊聯賽冠軍,以往雖然攞過菁英盃、足總盃,但係聯賽係長途戰,好考驗我哋嘅毅力、堅持,所以我會比較care聯賽。」