【有片】C朗神迹4天後 33歲朗尼美職戴帽

2019年03月17日 15:34
東網電視
更多新聞短片
(互聯網)

即睇朗尼帽子戲法:https://bit.ly/2HqxbuU 

呢邊廂,Fit到爆燈嘅C朗度拿4日前仲喺歐聯上演大奇蹟,連中三元帶領祖雲達斯反勝晉級;另一邊廂,C朗嘅前曼聯好拍檔朗尼,就喺地球另一邊嘅美職大放異彩!今晨朗尼喺場「月巴」大對決入面,將皇家鹽湖城嘅門將利文度技術性擊敗,不過,球迷賽後除咗欣賞朗尼仲有幾好波之外,都對「圓碌碌」嘅利文度勁感興趣,搞到朗尼風頭都畀呢個「肥龍」搶走晒囉!

前英格蘭國腳球星朗尼,好波之餘,近年愈嚟愈心廣體胖,因此贏得「月巴」呢個外號,不過勢估唔到,喺今朝場美職大戰,由呢位正牌「月巴」效力嘅華盛頓聯隊對皇家鹽湖城,竟然會遇到對手!事關唔少球迷同網民睇直播或者賽後睇片,都發現咗鹽湖城門將利文度,又係有個「圓碌碌」身型,加上佢個超親切面容,令球迷睇見都想笑。

介紹番呢個利文度,咪睇佢身型好似好遲鈍,查實佢都係美國國家隊門將之一,依家已經39歲嘅佢,02至06年間仲效力過華盛頓聯隊,而由07年開始,就一直效力鹽湖城。仲有,你睇利文度個樣都同一般美國人唔同,原來佢父母分別係菲律賓同墨西哥人,係混血兒囉。喺加州出生嘅佢自細已經係美國籍,由02年起,佢就入選美國國家隊做後備門將,至今一共為美國上陣22次;2014年佢仲入選埋世盃23人名單,唔嘢少呀!

講番呢場對決,先講鬥「月巴」呢,就應該利文度係稍勝嘅!不過鬥好波,話晒都曾經係世界頂級球星嘅朗尼,始終係終極贏家,喺佢今場大演帽子戲法之下,華盛頓聯隊就以5比2大勝。值得一提,今次呢個帽子戲法,原來係「正牌月巴」自舊年7月轉戰美職以來首次單場入3粒,而佢至今合共有5次試過喺美職單場入多過1球,證明都仲有大把貨,仲係好好波呀!


支持本地運動員,一齊去「睇體」!
https://bit.ly/2DxX4XI 

東網體育FB同你追實體壇每個精彩時刻!
http://bit.ly/2ecTF2A