偷食兼暴打老公 奧運金牌陳詩欣罪成!

2019年03月17日 18:36
東網電視
更多新聞短片
陳詩欣(左)罪行令人髮指。(互聯網)

中華台北跆拳奧運金牌女選手陳詩欣,雖然已經結婚並育有兩名子女,但竟偷食已婚教練,期間仲家暴老公,堅係離晒大譜。老公董俊男忍無可忍,上年將老婆同偷食男告上法庭,當地法院剛有判決,陳詩欣須向老公賠償30萬台幣。

1978年出世嘅陳詩欣,細細個就接受爸爸嘅跆拳道訓練,最終佢於2004年雅典奧運成功奪金,成為台灣之光。佢退役後同小學體育老師董俊男結婚定居花蓮,並開設道館推廣跆拳道。結婚後生咗兩名子女,以為陳詩欣會過住平凡但幸福嘅生活,但佢竟然同已婚跆拳教練陳正浩搭上,17年底2人被拍到兩周內兩次到酒店開房,仲喺街上旁若無人咁拍拖,完全忘記雙方各自已有家庭。

本身偷情已經唔啱,陳詩欣老公董俊男舊年仲大爆被家暴,話陳詩欣近半年來日夜都對佢「言語施暴」,仲試過喺個女面前郁手打自己,之後陳仲試過「踢開房門出腳攻擊」老公,董俊男直言係「接近發瘋的家庭暴力,自己已經無法再容忍這種狀況」。陳詩欣除打老公外,更迫女兒向佢匯報爸爸嘅一舉一動,如果做唔到就一巴巴打埋去,董俊男直斥老婆已冇晒人性同母愛。

舊年董俊男就將陳詩欣同陳正浩告上法庭,要求賠償100萬台幣,最終法院亦判董俊男勝訴,陳詩欣須賠償30萬台幣。二人到依家仲未離婚,但件事已搞到咁,睇嚟已返唔到轉頭。記者走訪走出法院後嘅陳詩欣,佢只係「謝謝大家的關心」,之後就悄然離去。

支持本地運動員,一齊去「睇體」!
https://bit.ly/2DxX4XI 

東網體育FB同你追實體壇每個精彩時刻!
http://bit.ly/2ecTF2A