波蘭8個球員流感 照贏拉脫維亞
20190325
東網電視
更多新聞短片
(法新社圖片)
歐國外G組，波蘭主場贏拉脫維亞2比0，賽果正常其實冇咩好寫，但今場背後原來大有文章，話說波蘭賽前受流感侵襲，多達8名球員受感染，即係冇咗3份1隊波，讓足車馬炮下都贏波，都算佢哋硬淨。
波蘭領隊Brzeczek賽前證實，球隊多達8名球員出現流感病徵，至於感染源頭懷疑來自國腳前鋒拿玻里嘅米利克，因為佢兩位拿玻里隊友，意大利門將阿歷斯美列特及西班牙中場法比安彭拿都因為發燒退出國家隊，但係米利克照來波蘭報到，感染其他隊友。
另一原因可能係波蘭上仗作客奧地利，期間入住酒店唔衞生，冷氣系統有事，導致多名球員患病。不過波蘭病還病，今次國際賽檔期嘅成績就幾唔錯，上仗作客1比0小勝奧地利，周一(25日)凌晨主場迎戰拉脫維亞，憑羅拔利雲度夫斯基及基歷克各建一功，以2比0贏波，歐國外兩戰兩勝，咁多人病咗都咁好成績，真係估佢唔到。
支持本地運動齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！