【有片】玩殘VVD　基拿比世界波阿迷最慘

即睇基拿比玩殘VVD射入世界波：https://bit.ly/2USsX2c　

歐國外巔峰大戰，德國終於做齣好戲，作客3:2絕殺荷蘭，不單報番之前2仗1和1負之仇，基拿比仲要玩殘荷蘭隊長華基爾雲迪積克，日耳曼兵團堅乜都贏晒！拜仁基拿比今仗多次單對單面對VVD都佔上風，上半場更於左路扣入大位，喺呢位被封為全球最佳中堅面前，射入超級世界波。德迷見到梗開心，但最慘就係阿仙奴Fans，佢哋都諗唔明，當日點解會放棄呢名新星。

荷蘭於歐國聯開始復甦，之前兩鬥德國1勝1和，更曾於主場大勝3:0。橙軍於歐國外首仗，以4:0大數白俄羅斯，無論係VVD抑或攻擊手迪比都大勇，德國預咗惡踢。不過德國前場今仗踢得好生，其中基拿比更加球王上身，上半場接應隊友後場傳送，於左邊引球單挑VVD，只見佢扣入右路，於VVD出腳前右腳彎入遠柱，呢名全球最高身價後衞，只能目送基拿比入金球。

下半場基拿比亦數次挑戰VVD，呢名信心爆棚嘅前阿仙奴小將，對住VVD都係選擇唔交，跟手於雲迪積克面前窄位起腳。基拿比於12至16年效力阿仙奴，雖被視為有潛質，但始終得唔到領隊雲格信任，先後被外借多間德甲球會，今年佢於拜仁上位，早前於歐聯16強首回合，去到晏菲路已經多次打爆利物浦穩陣左閘安德魯羅拔臣，阿仙奴球迷都話，每次睇到基拿比有表現，都會非常唔開心，因為本身呢位德國新星，可為兵工廠發光發熱。

支持本地運動齊去「睇體」！

https://bit.ly/2DxX4XI　

東網體育FB同你追實體壇每個精彩時刻！

http://bit.ly/2ecTF2A