【人物誌】拒投紅軍 舒侯斯德軍絕殺王
20190325
東網電視
更多新聞短片
（法新社）
即睇舒侯斯奠勝入波：https://bit.ly/2HF7syK
歐國外德國大打翻身仗，作客大勇荷蘭半場領先2球，換邊後瘋狂受壓被追成平手，之後仲不斷被主隊猛打大門，睇嚟如果有一方勝出，只會係橙軍。不過一位球員改寫德國命運，賀芬咸左閘尼高舒侯斯，去到完場前依然谷到禁區助攻，第一時間撞射入網勁有功架，舒侯斯成個人生，都係等呢個入球出現。
今年25歲嘅舒侯斯，細細個已經係天才球員，未加入哈化柏林之前，受到利物浦球探垂青，希望將佢帶到英國訓練，但舒侯斯一心想踢居住城市球隊，所以諗都唔諗就拒絕紅軍。舒侯斯17歲就為哈化一軍出場，到15年轉投慕遜加柏，之後不幸因十字韌帶撕裂而長抖，抖咗成年復出之後失去正選，到17年轉會賀芬咸。
賀芬咸重用年輕球員，而且踢法主攻，少帥拿高斯文盛讚簽得舒侯斯，將令球隊實力大增。佢形容舒侯斯運動細胞爆棚，而且速度黐線地快，係賀芬咸未來嘅重心球員。而於舒侯斯心目中，由始而終最大目標，就係為德國國家隊上陣。
上年8月舒侯斯終於德嘗所願，被勒夫選入國家隊，其中處子戰熱身賽對秘魯，更於85分鐘射入奠勝入球。近月來，舒侯斯成德國國家隊正選左翼衞，佢攻守兼備機動性強氣力充沛，仲擁有無限鬥心。今仗踢到後段，德國或都會滿意和波結果，但舒侯斯就係擁有超強爭勝心，最後再一次為國家隊絕殺對手，今次仲係戲劇性搞掂強敵荷蘭，勒夫肯定錫晒佢，舒侯斯個國家隊左翼衞位，似乎已非常穩陣。
支持本地運動齊去「睇體」！
東網體育FB同你追實體壇每個精彩時刻！