VVD迪歷特 真係世界最佳中堅組合？
20190325
東網電視
更多新聞短片
（Getty Images）
荷蘭由被捧到上咁高，一吓子跌番落人間，喺歐國盃外圍賽畀德國打爆，主場輸2:3全失3分。雖然前曼聯球員、現里昂王牌迪比一樣有出色演出，但荷蘭最引以為傲嘅中堅組合華基爾雲迪積克以及馬菲斯迪歷特，今場面對德國快速型前鋒疲於奔命，阿積士隊長迪歷特仲出醜跣低累球隊先失波，呢對被評為「全球最佳」嘅中堅拍檔，睇嚟仲有排浸。
VVD本季於利物浦，毫無疑問表現極為出色，紅軍31場聯賽僅失18球，雲迪積克功勞唔少。另外本季VVD於英超同歐聯，從來未試過畀對手扭過，呢啲數據堅係誇張，被捧為本季英格蘭足球先生大熱不無道理。但只要出得，雲迪積克本季從未缺陣紅軍任何1分鐘賽事，話唔攰就假，上場聯賽對富咸佢罕有犯錯爭啲累球隊失分，今場歐國外對德國，畀基拿比不斷起到腳，仲射入超級世界波，早前賴恩巴布話VVD有弱點，絕對唔係亂噏。
雲迪積克無疑速度快路數勁頭槌又好，單對單面對對手極有辦法，不過佢有時太過老定，而且態度比較輕率，今戰鬥基拿比就有呢個問題出現。基拿比射入世界波嗰球，VVD明顯未夠埋身，先畀基拿比起到腳。VVD被捧得太高，令佢容易出錯，若佢嚟緊於利物浦自爆多1、2次，紅軍要爭英超、歐聯凍過水。
阿積士隊長馬菲斯迪歷特，對比起VVD當然有更多缺點。呢名19歲小將，今季於歐聯表現一流，佢於VVD輔助下亦火速成長。不過今戰鬥德國，就係佢於禁區內跣腳，造就利萊辛尼輕鬆開紀錄。據聞利物浦有意於今夏買入呢名年輕中堅，但佢身價將高達7000萬鎊以上，利物浦與其又大灑金錢，不如用番祖高美斯好過，後者無論速度、路數及用波技巧，絕不下於迪歷特，不如留番大筆金錢，投資落防中，或者攻擊球員好過。
支持本地運動齊去「睇體」！
東網體育FB同你追實體壇每個精彩時刻！