等的士被打老婆傷埋 麥阿里士打塊面爛晒
20190325
東網電視
更多新聞短片
（互聯網）
前利物浦中場球星麥阿里士打，周六同老婆於英國里茲街頭受襲，等等吓的士被不知名人士拳打腳踢，面部嚴重受傷即時被送入醫院，上唇位置起碼要聯12至15針！呢名54歲好波之人係紅軍01年盃賽5冠王核心成員，周六入完晏菲路睇利物浦對AC米蘭嘅慈善賽後返到里茲，不單自己受襲，連老婆都於打鬥中整傷手腕，留醫到凌晨3點先出院，認真慘情。
現時同謝拉特一齊喺蘇格蘭打江山、於格拉斯球流浪做副領隊嘅麥阿里士打，於周六夜晚返到里茲，於等的士期間，懷疑與人發生爭執，二人最終打起上嚟，據英國《太陽報》轉述，當時麥阿里士打被人用拳頭重擊面部，塊面被打到爛晒係咁流血，之後佢被打到瞓咗喺地，40歲老婆Hayley不斷手推兇徒，混亂中自己亦手腕受傷。之後兇徒乘亂逃去，麥阿里士打兩公婆就被送入醫院。因為面部受創嚴重，麥阿里士打須聯超過10針。
英國記者追訪麥阿里士打及其妻子，二人都冇交代事情始末，只係話已報警求助。
麥阿里士打嘅紅軍之旅非常戲劇性，2000年佢以35歲高齡，免費簽約利物浦，迅即成為球隊正選並勁有貢獻，其中歐足協捧盃之路中，4強就射入1球12碼，帶領利物浦淘汰巴塞隆拿，亦於決賽轟入極刑，協助球隊5:4擊敗艾拉維斯捧盃。另外，佢於英超亦射入一球44碼罰球，幫紅軍擊敗愛華頓。
支持本地運動齊去「睇體」！
東網體育FB同你追實體壇每個精彩時刻！