【有片】亚洲肥仔唛示范最有体育精神12码

20190327
东网电视
更多新闻短片
(互联网)
土耳其1场U14青年军赛事,成为欧洲各大传媒报道热话,但其非比赛特别激烈,或者有新星出现,而系因为1球12码。
事缘加拉塔沙雷13岁小将艾马斯比高夫杀入禁区时,并冇同对手接触,而系自己失去平衡跌倒,但球证却吹罚12码。
虽然呢位来自中亚国家吉尔吉斯嘅小朋友,表明对手并冇犯规,但由于球证已经作出判决,唔会改变。
身为队长嘅艾马斯比高夫决定用自己方式“还畀对手”,佢亲自操刀主射,故意踢出底线,够晒诚实。
赛后,欧洲各大传媒都大赞艾马斯比高夫好有体育精神,话小朋友都知乜嘢系体育精神,懂得分辩是非黑白,反观当今唔少球星以“插水”博罚球,真系应该好好反省一下。唔知巴西“碌地王”尼马睇完呢幕之后,有乜嘢感受呢?
另有网民指小朋友世界始终比较纯真,大人世界充满狡猾,希望艾马斯比高夫可以保持呢份纯真。
其实香港都发生过类似情况,就系2003年贺岁杯,伊朗对丹麦,临完上半场,伊朗球员误以为场边球迷吹哨子声系球证吹完半场鸡声,喺自己禁区内用手执起个球,球证立即吹罚佢犯手球,判罚12码,丹麦队长韦确斯同领队教练商量后,决定故意射出界,证明有时体育精神重要过入波。
东网体育FB同你追实体坛每个精彩时刻!
Follow东网体育IG一齐撑本地运动员!