曼聯新季黃金陣容 蘇B：奪英超係我責任
20190329
東網電視
更多新聞短片
（互聯網）
經過99日嘅考察，蘇斯克查終於坐正成曼聯正式領隊。於蘇B麾下，紅魔鬼重拾生氣、更衣室再現和諧，呢位於球員時代6奪英超錦標、於99年歐聯決賽射入創造奇迹入球嘅新帥，表明奪得英超冠軍係佢責任，仲話球會一定會速戰速決、於7月中踢季前熱身賽前，就會完成換血工作，似乎對帶領球隊中興極有信心。
「奪得英超冠軍絕對係我責任。對曼聯嚟講，奪英超錦標係必然目標，而且亦係球會習慣。不過要完成呢個目標要循序漸進，唔係一、兩個星期就可以發生嘅事。」對於點帶領曼聯復興，蘇斯克查指將於夏天做「一些交易」：「我同球會團隊，會坐低研究點令曼聯繼續向前。傳媒講我哋會賣人，亦預計會有好多球員渴望加盟。我哋會盡快決定斟介目標，並希望喺踢季前熱身賽前，完成所有收購。」曼聯將於7月13號去到澳洲踢首場熱身賽，對手係珀斯光輝。
曼聯頭號收購目標，係多蒙特翼鋒查頓辛祖，除咗呢名18歲新晉英格蘭國腳外，韋斯咸中場迪格蘭賴斯，以及水晶宮守衞雲比沙卡都喺蘇B「雷達」之內。皇馬中場、德國世界盃冠軍成員卻奧斯，以及國米中堅史堅尼亞亦好可能加盟，再配合迪基亞、保羅普巴、尼曼查馬迪、盧卡古、拉舒福特及安東尼馬迪爾等原有班底，曼聯新季陣容好有睇頭。
而根據外國博彩公司賠率，於蘇斯克查3年任期內奪得英超冠軍，賠率為4倍，若下季就撐聯賽冠軍則為9倍。不過博彩公司亦有為蘇B於19年內被炒開出盤口，賠率為11倍。
東網體育FB同你追實體壇每個精彩時刻！
Follow東網體育IG一齊撐本地運動員！