【港超專版】醫好舊患　梁嘉恆滿血復活

「不經一番寒徹骨，焉得梅花撲鼻香」，效力理文的梁嘉恆深明這個道理。自來港加盟和富大埔後，當時還在大學進修的「嘉恆」過着奔波的生活，畢業後滿以為可以全心全意在足球路上打拚，卻受傷患困擾：「粒釘係我嘅轉捩點，只係一個好細嘅手術，但當時醫生都做得唔好，所以我想趁依家追番我以前失去嘅嘢。」■圖／文：陳焌鏗

傷患的禍害不只是生理，還有心理。以局外人的身份看，總以為「嘉恆」充滿自信，事實上，他只是比一般人堅強一點：「表現好唔好其實好睇我嘅信心，因為之前左腳斷過腓骨，當時打咗粒釘落去，可能係呢幾年訓練量大咗好多，粒釘令到我好多動作做唔到，信心受到打擊。菁英盃對傑志之前我做咗次特別嘅治療，將自己啲血濃縮後再打入隻腳，幫入面啲組織生番好啲。以前我搵過好多治療方法，想令自己隻腳好啲，去到今季先知有呢個療法，結果嗰場波係我喺香港感覺最好嘅一場。」

他亦明言：「我好希望有番未嚟香港嗰陣時嘅狀態，踢波唔使成日就住，亦期望自己之後嘅表現可以穩定啲，唔好一場好一場差，我唔鍾意咁。」

難忘菁英盃激贏傑志

當日菁英盃分組賽對傑志，理文猶如坐過山車一樣，曾經兩度領先，卻被對手兩度追平，在隊長干沙利斯挺身而出下，成功擊敗對手並取得4強資格。回想起當日的心情，「嘉恆」坦言：「其實被追平嗰刻係好洩氣，因為球隊練習氣氛好好、好投入、好畀心機，但係每次比賽都係爭啲爭啲。嗰場波我哋係特別精神，因為理文未贏過傑志，所以好想用一場勝仗去報答大家嘅支持。」

現時「嘉恆」為了自己的夢想，即使有空餘時間，也絕不會偷懶：「我會自己去練控制嘅動作，係以前我一路都缺乏嘅嘢，加上理文嘅體能教練係我同鄉兼澳門代表隊隊友，佢依家同我一齊住，我每日都會搵佢同我做一啲復健嘅嘢，加上物理治療跟得好足，目前情況我都幾滿意。」

與體能教練「同居」學識保養

梁嘉恆目前與體能教練蔡振賢均住在球會提供的寓所，與「城隍廟」在同一屋簷下，「嘉恆」當然要「求支好籤」：「佢喺球場上好認真，但場外就係朋友咁相處，今年開心咗係因為有多個人陪我，以前好多嘢都要自己硬食，有佢喺度有得呻吓。依家我日日跟住佢都學到好多嘢，只要識得練、識得保養，踢到三十幾四十歲都可以。」

「嘉恆」亦對好友讚不絕口：「佢成日叫我比賽前3日食多啲碳水化合物，練完波都會飲奶粉、食補充品，同埋有啲嘢係嗰個時間食先有用，好似香蕉同能量棒，其實係熱完身先食，今季喺呢啲細節上面做得好咗，所以我踢足全場都無問題。」

梁嘉恆

出生日期：1992年11月22日

身高：1米80

體重：75公斤　

位置：前鋒

曾效力球隊：澳門發展隊、蒙地卡羅、和富大埔、香港飛馬

現效力球隊：理文　

球衣號碼：92