一腳踩落去！中超惡爺要人絕子絕孫！
20190402
東網電視
更多新聞短片
（互聯網）
有啲部位，稍微撞親一下都會痛不欲生，如果畀人狠狠踩一腳，真係邊度都唔使去。中超重慶斯威對深圳佳兆業，重慶外援阿德里安同深圳隊長葛振短兵相接，葛振被對方推倒落地，老羞成怒之下一腳踩落對手下體，痛到阿德里安慘叫。呢個絕子絕孫腳離晒大譜，葛振梗係即食紅牌啦！
葛振之後死晒狗，翌日喺微博向阿德里安道歉，話自己唔係有心咁做，只係「身體倒地失去平衡導致雙腿騰空，那一瞬間下意識的伸了腿，的確不是故意」，但佢睇番段片，就覺得自己動作實在太大，所以向阿德里安「誠懇的道歉」。
正如國內傳媒所講，如果道歉有用，呢個世界就唔再需要有球例，故葛振依然受到傳媒同球迷一面倒批評。之後深圳佳兆業決定扣葛振一個月人工，兼踢佢落預備組以作懲罰。有國內傳媒撰文表示，依家中超球會對「極度重犯」都先作內部處分，「下放預備組」已成潮流，表面上係「有家教」，但實際上係想先足總一步懲罰球員，以減少被罰停賽場數。
東網體育FB同你追實體壇每個精彩時刻！
支持本地運動員，一齊去「睇體」！