韓職恐怖犯規攞人命 韓媒竟然鬧中國
20190405
東網電視
更多新聞短片
日前韓職出現恐怖犯規，尚州尚武後衞金榮彬，衝行跳起飛腳踩落對手面部，痛到後者掩面大叫倒地！韓媒事後大肆批評金榮彬，仲無啦啦扯埋中國足球嚟講，話以往「暴力足球」只會喺中國出現，依家竟然連韓國都有，認真離譜。
呢場賽事由水原三星對尚州尚武，主隊廉基勳於進攻右路近邊線想用頭槌頂波，金榮彬火速殺到，有理冇理跳起飛踩廉基勳右邊面部，真係睇到都覺得痛。金榮彬黐線都咁，球證當然直接拔紅趕佢出場。
金榮彬呢腳直頭想攞人命，雖然事後廉基勳話金榮彬已經向佢道歉，並話足球比賽出現呢啲場面唔出奇，而自己亦冇受好大嘅傷害，但當地球迷同媒體冇諗過放過佢，其中《Insight》就將金榮彬呢一腳，扯埋中國足球嚟講：「韓職竟然出現殺人式犯規，呢啲只係中國球員先會做嘅事。韓國球迷依前講功夫足球、暴力足球，都係中國足球嘅代名詞，依家竟然會出現喺韓國，真係令人震驚。」
之前國足於中國盃對烏茲別克，韋世豪一次攞命腳受到口誅筆伐，當時韓國傳媒亦都有瘋狂報道，估唔到過唔到幾耐，金榮彬嘅犯規動作仲茅過韋世豪，可能因為呢個原因，韓媒就扯埋中國足球嚟講。
支持本地運動齊去「睇體」！
東網體育FB同你追實體壇每個精彩時刻！