【人物誌】隱瞞老竇身份 細哨囝囝堅叻仔！
20190407
東網電視
更多新聞短片
巴甲勁旅高士路日前宣布，正式同14歲學新星祖奧文迪斯簽署5年合約，祖奧文迪斯係乜水？佢就係巴西傳奇球星朗拿甸奴個囝囝囉！
貴為巴西球壇巨星之子，祖奧文迪斯細細個已經想做足球員，佢亦遺傳老竇嘅好波DNA，不過呢個細路相當有大志，據報佢去高士路青訓嗰陣，刻意隱瞞自己係「朗拿甸奴兒子」嘅身份，避免自己因為係「星二代」而受到球會特別關照，最終佢因憑自己實力贏得高士路賞識。
高士路總監列比路表示：「祖奧文迪斯好有潛質，佢嘅性格亦非常有趣，我相信佢好快就會成為球隊職業大軍一員。」祖奧文迪斯司職前鋒，曾經喺華斯高學法，之後亦去過巴黎聖日耳門試腳，高士路教練形容佢擁有高大身型同細膩技術，而且可以擔任正箭頭或者「9號半」位置，屬於技術全面嘅進攻多面手。
點解祖奧文迪斯個名同朗拿甸奴差咁遠呢？查實佢係朗拿甸奴同女子舞蹈員查拉娜喺2005年2月所生，不過眾所周知「細哨」係隻冇腳嘅雀仔，所以佢哋之後亦冇喺埋一齊，祖奧文迪斯個姓就係跟佢繼父所改。
東網體育FB同你追實體壇每個精彩時刻！
支持本地運動員，一齊去「睇體」！