屈仔送禮兼打少個 阿仙奴都爭啲贏唔到

20190416
東網電視
更多新聞短片
賓科士打遲出腳解圍,奧巴美揚閂個波入網奠勝局。(Getty Images)
即睇全場精華:https://bit.ly/2PdcXps 
屈福特近10次鬥Big 6球隊輸9次,阿仙奴有超過80分鐘打多個,對手門將仲送禮失波,阿仙奴都只能僅勝1:0。英超周一深夜獨腳戲,兵工廠作客屈福特,主隊門將賓科士打遲遲唔解圍,畀奧巴美揚閂咗個波入網,主隊之後仲有隊長迪尼起肘領紅,但兵工廠之後毫無優勢,若非屈仔中完柱又中楣、仲有有美蘭尼爾斯救空門,阿仙奴都攞唔晒3分。
今戰頭11分鐘已出現連番高潮,10分鐘真馬特後場回波畀賓科士打,佢稍為攞波甩腳,諗住解圍時候,奧巴美揚已殺到將皮球閂入網窩,兵工廠打開紀錄。1分鐘迪尼於前場同盧卡斯托拉拿短兵相接,前者起肘批中托拉拿面部,球證拔紅將佢趕出場。雖然失完冤枉波又打少個,但面對後防不穩嘅客軍,主隊攻門頻頻,20分鐘主隊罰球斬中造成混亂,卡夫卡特近門狂轟被救到再中柱。伊禾比係客軍今仗表現最佳球員,26分鐘禁區內起腳省中人,賓科士打反應快撲出。32分鐘屈仔伊天卡普爾主射罰球直飛遠柱,賓特尼奴飛身救出。
半場休息時艾美利換走托拉拿換走奧斯爾,之後再換入古安杜斯同美蘭尼爾斯,不過阿仙奴始終冇乜優勢,當中要怪米希達利恩,56分鐘佢接應伊禾比左路高波傳中,第一時間一射,畀賓科士打救出,之後再兩番起腳都唔中龍。屈福特雖然打少1個,但客軍後防鬆散,主隊幾吓簡單傳送已周時打入心臟地帶,62分鐘阿當馬仙拿左腳遠射靚到爆,可惜中楣彈出。80分鐘安達格雷扭過門將一射,可惜畀美蘭尼爾斯救空門,阿仙奴最後倖保1:0勝局,33戰積66分,以較佳得失球差壓過車路士升上第4。
延伸閱讀:
【賽後解碼】阿仙奴患作客癌 爭前四難
東網體育FB同你追實體壇每個精彩時刻!
Follow東網體育IG一齊撐本地運動員!