【賽後解碼】阿仙奴患作客癌 爭前四難

2019年04月16日 06:05
東網電視
更多新聞短片
(Getty Images)

英超去到季尾,前四爭逐空前激烈,今輪阿仙奴去到屈福特地頭,比賽早段已經有對手送禮,加上屈仔隊長迪尼起肘批人申請紅牌被逐,基本上比賽應該已擺入雪櫃。不過阿仙奴之後毫無優勢,入唔到第2粒之餘,仲要被對手中完柱又中楣,最後僅勝冇乜說服力。阿仙奴於艾美利麾下,作客跌Watt問題極為嚴重,同主場演出有天淵之別,未來佢哋仲有3場英超作客,要爭前四困難重重。

今仗阿仙奴演出最好嘅係伊禾比,就算奧巴美揚一箭定江山,但其把握力依然大有改善空間。或者因有歐霸盃後顧,又早早領先1球,阿仙奴大部份球員今仗漫不經心,一條中場線除盧卡斯托拉拿有攔截力外,其餘球員如格列沙加等均用眼神防守,中後場截擊力極弱之下,屈福特打少個要進攻仍綽綽有餘,反映兵工廠後防不濟問題嚴重。

另外,米希達利恩狀態低迷,下半場多次埋門俱在水準以下,後備奧斯爾及古安杜斯入場後又零貢獻,兵工廠作客可謂攻不銳守不穩。事實上,阿仙奴本季英超作客成績,只得6勝4和6負,比水晶宮仲要差;踏入2019年,球隊已先後不敵韋斯咸、曼城、巴迪、雷恩同愛華頓,今仗若非屈仔早早打少個,兵工廠失分機會好大。

阿仙奴患作客癌,周中轉戰歐霸8強作客拿玻里,雖有2球優勢但完全穩陣;季尾聯賽佢哋要作客狼隊、李斯特城及般尼,要保住前四難度甚高。

東網體育FB同你追實體壇每個精彩時刻!
http://bit.ly/2ecTF2A 

Follow東網體育IG一齊撐本地運動員!
http://bit.ly/2EYxoRh