落場遊魂冇腳掂 廠迷:我哋都係打少個

20190416
東網電視
更多新聞短片
(互聯網)
英超阿仙奴作客屈福特,兵工廠靠對手門將賓科士打派膠,最終小勝1:0。雖然話就話「三分已袋」,但兵工廠表現實在唔掂,球迷睇到眼火爆,贏波都要搵戰犯,雖然古安杜斯、奧斯爾等都冇表現,但都唔夠米希達利恩犯眾憎。呢名阿美尼亞國腳本季長期低迷,今場又接二連三射波無譜,難怪外地廠迷話,雖然今場表面上阿仙奴人多蝦人少,但事實上係同10個打10個冇分別。
米希達利恩雖然今季有6個聯賽士哥,但於艾美利麾下絕非正選之才。對上一次打正選,已經係超過1個月前歐霸不敵雷恩一戰嘅米希達利恩,呢場最大機會係下半場走空晒、面對賓科士打嘅一射,可惜近門一抽都未能入波。呢球可以話賓科士打出迎快,但之後佢分別左右開弓,都離晒大譜射唔中目標,演出的確差勁。外地廠迷於網上狂插呢名創造型中場,話佢喺場上遊魂形同虛設,阿仙奴好似打少個一樣。米希達利恩再唔提升表現,睇怕今夏都會畀艾美利趕走。
東網體育FB同你追實體壇每個精彩時刻!
Follow東網體育IG一齊撐本地運動員!