【賽後解碼】賓施馬係施丹護身符
20190416
東網電視
更多新聞短片
皇家馬德里自從施丹回巢執教後，成績算係穩步上揚，周二(16號)作客打和雷加利斯1比1後，5場比賽贏拎到3勝1和1負，而陣中最值得施丹信賴嘅球員，非法國前鋒賓施馬莫屬，佢喺對雷加利斯一仗繼續入波做救世主，可以話係施丹嘅護身符。
賓施馬向來係施丹愛將，佢已經連續第4場聯賽入波、施丹回巢後5場入5球，西班牙《阿斯報》賽後畀佢全場最高嘅7.6分，教練施丹亦大讚：「賓施馬今季踢得好好，尤其係入球數字方面非常理想，我戥佢開心。」賓施馬上季只得5個聯賽入波，但今季未踢完已經有18球，係佢皇馬生涯第3高產球季，僅次於15/16年(24球)同11/12年(21球)。施丹來季重建皇馬，相信31歲嘅賓施馬仍然係計劃中重要部份。
東網體育FB同你追實體壇每個精彩時刻！
支持本地運動員，一齊去「睇體」！