總結：勇士輸波事小 古辛斯收檔大件事！
20190416
東網電視
更多新聞短片
周二(16號)NBA西岸季後賽，勇士主場以131比135不敵快艇，總比數被追成1比1平手。本來喺7場4勝嘅賽制之下，勇士輸1場波對佢哋晉級唔算致命打擊，不過中鋒古辛斯重傷就非常大鑊，據報古辛斯左腳股四頭肌疑似撕裂，將面臨數個月休養，意味成個季後賽都唔使預佢，內線薄弱將成勇士爭冠最大憂慮。
古辛斯喺第1節一次飛身救波嗰陣左腳受傷，佢雖然可以自己起身，但隨即離場返更衣室接受治療，網上流傳一張古辛斯離場途中相片，見佢左腳嚴重腫起。《ESPN》消息指隊醫懷疑古辛斯股四頭肌撕裂，但要經MRI檢查先至可以確定。最樂觀情況係股四頭肌拉傷，但如果證實真係撕裂，古辛斯將會休戰幾個月。勇士今場本來表現對辦，上半場完結拋離快艇23分，但快艇下半場瘋狂反撲，路爾斯威廉斯轟入36分同交出11次助攻，加連拿利同夏利爾分別攻入24分同25分，成功打爆勇士。
同日另一場東岸季後賽，76人主場145比123大破籃網，總場數追成1比1平手，76人喺第3節單節攻入51分，追平NBA季後賽史上單節最高得分紀錄。
最新賽果(前者主場)
勇士 131:135 快艇
76人 145:123 籃網
東網體育FB同你追實體壇每個精彩時刻！
支持本地運動員，一齊去「睇體」！