【人物誌】超癲!佢1場波救出17次射門

2019年04月16日 16:01
東網電視
更多新聞短片
(Getty Images/互聯網)

即刻睇片,見識下達高禾斯基有幾犀利:https://bit.ly/2UkRFan 

周二(16日)凌晨意甲,阿特蘭大主場同安玻里打成0:0,齋睇比數就不值一提,但原來戰情非常激烈,阿特蘭大全場狂轟47次射門,但都入唔到波,事關安玻里門將達高禾斯基踢到上晒身,勇救17次射門,創出意甲單場撲救次數紀錄,簡直有神功護體,賽後被評為10分滿分嘅完美表現。

阿特蘭大要爭入前4,而安玻里要護級,大家都唔輸得,但戰情就一面倒,阿特蘭大佔盡上風,全場有47次射門,淨係2位進攻主力,艾真度高美斯同杜雲沙柏達加埋已經有16次,起碼應該入到6球。反觀安玻里只有3次射門,1次中目標。

不過,任由阿特蘭大點射,總係被達高禾斯基救到,真係冇晒符,呢位年僅21歲嘅波蘭小將戲劇性演出,比曼聯門將迪基亞更加神奇,結果一戰成名,人氣急升。

身高1米91嘅達高禾斯基係天才門將,16歲已經為波蘭球隊Jagiellonia Bialystok出戰頂級聯賽,出道首季就當選聯賽最佳門將,3年前被費倫天拿簽入。

不過,達高禾斯基登陸意甲之後,少有上陣機會,只曾為費倫上陣7次,而且未入選過波蘭大國腳,今年1月更被外借去安玻里,但亦非正選門將,經過今場神級演出之後,相信佢將可以坐穩正選,甚至可能引來大球會注意。

事實上,優秀門將難求,強如皇馬等豪門都為門將人選感到煩惱,達高禾斯基忽然冒起,勢必掀起一場爭奪戰。祖雲達斯現時都係由波蘭門將施捷斯尼把關,隨時簽埋佢師弟達高禾斯基都唔奇。

東網體育FB同你追實體壇每個精彩時刻!
http://bit.ly/2ecTF2A 

Follow東網體育IG一齊撐本地運動員!
http://bit.ly/2EYxoRh