阿積士反勝祖記　C朗歐聯夢碎

東網電視

(法新社圖片)

《彩報》豪裝，入市即贏！撳撳呢條Link，寶藏等你拎：http://win.on.cc/football/　

唔止足球睇波，仲有24小時滾動賠率，即時體驗：https://bit.ly/2UmNL0L　

你不知道的歐聯！即去全新包裝彩報網上版：https://bit.ly/2Z3RXGj　

歐聯8強次回合爆大冷，阿積士繼16強淘汰皇馬後，8強火併祖雲達斯又創奇迹，今仗作客祖記在先失1球下連陷兩城，以2比1反勝，兩回合合計贏3比2殺入4強，祖記黯然出局，C朗歐聯夢碎。

首回合兩隊踢成1比1，祖記返主場出擊只要唔失波就晉級，而且仲有球王C朗於28分鐘接應角球頭槌破網，該入球由於有阿積士球員倒地，球證憑VAR證實入球有效，祖記領先1比0，形勢大好。

C朗入波亦刷新多項紀錄，包括連續7屆歐聯8強入波，共入13球，個人第126個歐聯入波，65個淘汰賽入波，第799場球會賽第599球，今屆4個球槌入波亦係所有球隊之冠。

不過祖記優勢維持唔夠10分鐘就被追和，薛耶治遠射，雲迪碧克門前截下再推射死角入網，由於貝拿迪斯治在邊線包越位，球證憑VAR確認入球有效，阿積士扳平1比1，兩回合合計2比2，1個入波將形勢扭轉。

下半場成為祖記噩夢，不但入唔到波，更於67分鐘被歐洲金童馬菲斯迪歷特在敵衞包圍下頭槌破網，阿積士反勝2比1，由於有兩個作客入球，祖記追和都出局，要入兩球先可晉級。

阿積士餘下時間不但冇死守，仲多次組織埋門，79分鐘薛耶治妙射破網，但球證憑VAR證實有人越位在先，入球無效，末段祖記有12碼機會，戴利白蘭特犯手球，但睇完VAR後證實係波打手，冇判12碼，最終阿積士贏2比1，總比數贏3比2殺入4強。