【紅魔出局】曼聯創史上最曳歐聯紀錄
20190417
東網電視
更多新聞短片
（Getty Images）
曼聯去到魯營怒吞3蛋，毫無懸念完敗出局，當中仲有鋼門迪基亞出醜派膠，被封「西班牙卡利奧斯」，領隊蘇斯克查面目無光，魔迷當然想搵窿捐。原來今次曼聯總計怒輸0:4出局，係球會歷史上歐戰兩回合最大差距敗陣；另外曼聯今屆成個賽事，於奧脫福只曾入過1球，堅係羞家。
首回合勞基梳爾擺烏龍輸0:1，次回合曼聯作客巴塞，矢志複製上圈淘汰巴黎聖日耳門美夢，點知美斯4分鐘內連入2球，完完全全將曼聯打落地獄。「地上最強」下半場仲有菲臘比古天奴轟入世界波，兩回合輸夠0:4拜拜歐聯。曼聯自參加歐戰以來，從來未試過於兩回合計賽事吞夠4蛋出局，今次咁樣輸法，相信無論係曼聯上下以至球迷，都希望盡快忘記。
另外，曼聯今個賽事於主場共打5仗，先後對過華倫西亞、祖雲達斯、年青人、PSG同巴塞，當中只有對年青人入過1球，該仗曼聯鬥同組最弱球隊，於完場前入球僅勝1:0，入波仲要係已經離隊嘅費蘭尼，可想而知曼聯球迷有幾失望。
東網體育FB同你追實體壇每個精彩時刻！
支持本地運動員，一齊去「睇體」！