歐聯冠軍名宿 曼聯畢特怒打老婆被捕！
20190417
東網電視
更多新聞短片
畢特同老婆Shelley Barlow（圈）。（互聯網）
曼聯剛於歐聯大敗出局，廿年前歐聯決賽大奇迹日、正選為紅魔上陣嘅畢特，剛涉嫌打老婆被捕。現年44歲、現為曼聯青訓「揸Fit人」嘅畢特，於英國時間尋日下晝被當地警方於其家中拘捕。據《鏡報》透露，畢特於下晝2點返到曼市家中執拾行李，同老婆發生激烈爭吵，期間一名女士致電報警報稱被打受傷，畢特現正被帶走調查。
當地記者走訪畢特住處，搵到一名目睹經過人士：「我睇住畢特喺屋企被警察拘捕。之前我聽到佢返屋企，同屋企入面嘅人講要執行李走人，之後佢同一個女人大吵大鬧發生激烈衝突，個女仲話畢特打佢。」
曼徹斯特警方表示：「我哋大約喺下晝2點收到求助電話，一名女子話自己喺屋企被打受傷。我哋去到該地址，將一名涉嫌毆打女人嘅44歲男士拘捕，依家仲係調查當中。該名女士隻手有一處傷痕，但唔使去醫院治療。」
畢特於2008年同Shelley Barlow結婚，依家有2名子女。《鏡報》搵過畢特嘅經理人，但就冇收到回覆。除咗畢特惹上麻煩外，曼聯另一名宿史高斯，亦因為違規賭波面臨被英足總指控。
延伸閱讀：
【4年違規賭波140次 史高斯被足總指控】
東網體育FB同你追實體壇每個精彩時刻！
支持本地運動員，一齊去「睇體」！