一直係高普飛佛 利物浦誓買德國天才
20190417
東網電視
更多新聞短片
（互聯網）
今季問鼎英超冠軍嘅利物浦，領隊高普講過，今夏難再好似前幾個轉會窗咁天價收購球星，但若心儀球員低價有得傾，梗係要出手搶人！利華古遜快翼、德國國腳祖利安白蘭特，於17年夏天曾成為高普重點斟介目標，最後收購失敗先扑槌買穆罕默德沙拿，高普有幾睇得起白蘭特不言而喻。據英媒透露，紅軍將於今夏重啟收購白蘭特，因為只要2150萬鎊，就可以買到呢位好波之人！
高普來自德國，當然對祖國足球瞭如指掌，早於2年前已睇中白蘭特，希望佢成為紅軍正選鋒線嘅重要成員。可惜當時利華唔放人，先造就「沙拿神話」。呢名既可踢翼又能勝任攻中嘅年輕球星，本季於各項賽事上陣38次貢獻14次助攻同7個入球，雖然數據唔算太搶眼，但佢活動範圍大、快速而又合作性強嘅特點，好啱高普足球哲學，故有傳高普對佢念念不忘。
於白蘭特嘅合約入面有項條款，講明若利華未能取得歐聯資格的話，到夏天邊隊出到2150萬鎊就可購得該名球星，英媒表示紅軍極可能出手，以強化球隊嘅攻擊線。
東網體育FB同你追實體壇每個精彩時刻！
支持本地運動員，一齊去「睇體」！