【有早知】活得比你好 前紅魔撐起阿積士
20190417
東網電視
更多新聞短片
(Getty Images/法新社圖片)
你不知道的歐聯！即去全新包裝彩報網上版：https://bit.ly/2Z3RXGj
周三(17日)凌晨兩場歐聯打完，曼聯出局，阿積士晉級，細心留意一下，發現阿積士有兩位前紅魔鬼支撐大局，分別上年失意離開奧脫福嘅後衞戴利白蘭特，以及現時已擔任總監嘅雲達沙。
名將之後嘅戴利白蘭特憑2014年世界盃出色表現，強勢成「魔」，但4年英超生涯之中，表現經常受批評，甚至因為防守甩漏，而被寸係「盲佬」(佢嘅姓氏Blind有失明嘅意思)。
戴利白蘭特當年演出未如理想，好大程度受曼聯整體低潮拖累，佢今季重返阿積士之後，如魚得水，成為球隊防線支柱。
當全世界都讚19歲中堅馬菲斯迪歷特天才橫溢，但唔可以忽略戴利白蘭特從旁協助，畢竟呢位29歲中堅屬於阿積士陣中少有嘅「老將」，佢嘅大賽經驗對球隊幫助好大。
至於由2005至11年為曼聯把守大門嘅雲達沙，2012年返回阿積士做管理工作，2016年晉升為總監，負責球會發展策略，多得佢高瞻遠矚，將阿積士打造成歐聯爭標份子，認真神奇。
事實上，早幾年傳出曼聯想邀請雲達沙回巢，主管轉會事務，但最後不了了之。睇完今輪歐聯賽果，紅魔鬼管理層依家一定好後悔。
東網體育FB同你追實體壇每個精彩時刻！
Follow東網體育IG一齊撐本地運動員！