亞協盃　兩連勝！「綠戰士」4比2贏航源

「亞協盃」I組賽事周三（17日）晚上假旺角大球場上演，由和富大埔主場迎戰中華台北的航源FC。最終和富大埔憑伊高沙托尼梅開二度，以及翟廷峯和陳肇鈞各入一球，以4比2擊敗客軍，分組賽以來兩戰兩勝！

大埔今場擺出352陣式，前線由伊高沙托尼和辛祖掛帥，而航源的兩名海地國腳約瑟和亞歷山卓，則如賽前所料擔任正選。開賽初段大埔較為積極，不斷以側擊向航源施壓。第一個較有威脅的射門在11分鐘出現，辛祖接應傳中施頂被黃秋霖接實。航源之後不甘示弱，班奇14分鐘罰球直射中楣彈出。大埔在17分鐘先開紀錄，雖然辛祖未能把握黃金機會，但仍有黃威後上傳中，伏兵門前的翟廷峯頂入，大埔領先1比0。班奇上半場不斷以罰球考驗曾文輝，在第3次終於成功，他在33分鐘禁區頂直射，皮球穿過人牆入網，航源扳平1比1。航源開心不夠1分鐘，伊高沙托尼「一盆冷水照頭淋」，他在34分鐘左路扣過守衞後窄位射入，為大埔再度領先。42分鐘，利馬離門30多碼遠射，勁度十足可惜角度欠奉，射門只告斜出。上半場和富大埔憑翟廷峯和「伊高」的入球，以2比1領先優勢返回更衣室。

易邊後，和富大埔繼續主導形勢，51分鐘辛祖窄位施射被門將接實。55分鐘，大埔擴大比數，伊高沙托尼半單刀「快放」一段，扭過門將射入，為大埔領先3比1。落後的航源未嘗沒有埋門機會，61分鐘後備入替的陳慶烜接應傳中「篤射」中柱，未能替客隊追近比數。不過他們的努力終在6分鐘後得到回報，南韓球員朱益成接應班奇妙傳單刀射入，為航源追近至3比2。82分鐘，利馬壓入禁區被敵衞勾跌，球證判罰12碼。操刀的伊高沙托尼「宴客」，未能替大埔再下一城。不過這名巴西外援在90分鐘成功交出助攻，左路開出罰球陳肇鈞近門接應得手（亞洲足協顯示為黃士源烏龍球），將比數改寫成4比2。

最終這場「亞協盃」I組第2輪賽事，和富大埔以4比2擊敗客軍航源FC。奪得3分的大埔暫時與4.25 SC同得6分，惟得失球差少1球屈居小組第2。

賽後和富大埔主教練李志堅表示：「贏波係重要嘅，我哋賽前部署都希望進取少少，亦製造到好多機會，只不過喺個過程入面，拉唔開比分係關鍵，呢樣唔喺我計畫入面，但慶幸有4比2嘅結果。」雖然球隊已取得兩連勝，但他認為：「依家都係言之尚早，因為要作客，但係兩連勝係好開始，下場對完4.25之後，形勢會再明朗啲，球隊上下都係希望全力去代表香港。」然而，今仗的勝利需要付出代價：「『阿聰』喺上半場因為一次碰撞受傷，我哋都提早換走佢，我諗佢傷勢唔係太大問題，反而係利馬，因為佢甩臼，但都即時托番入去，呢個我會擔心啲，還好醫生初段診斷養傷時間唔會太長。」「堅Sir」說。

兩仗合共失了4球，「堅Sir」坦言：「換個角度睇，兩場波我哋入到8球，呢啲就係足球。我哋一定要承認有啲嘢可以改善，睇番呢場波，第一個失球係罰球，係咪可以避免呢？如果你問我，我覺得唔係罰球㖭。但係第二個失球就溝通上可以改善，我哋希望減少失誤，但球隊喺好大決心去爭取入球嘅時候，必須有啲代價。」

問到下場對4.25SC時，他謂：「未對傑志之前，我都覺得4.25係支好有實力嘅球隊，始終我哋都對過黎明，喺佢哋本土聯賽，4.25甚至輸過畀黎明，但最後佢哋都係第一。我一向都覺得佢哋係呢組實力好少少嘅球隊，但睇番佢哋對傑志，上半場都係打和，我諗呢個係關鍵。我會再去研究下場波，因為我哋會了解傑志多啲，如果有一個對比，我哋會去做好啲，始終4.25都係支有唔錯實力嘅球隊，呢個係我哋嘅挑戰。打多個亞協，衝出亞洲，代表香港，係一個挑戰亦係進步嘅機會，我好希望我哋做到好啲，就算贏唔到，和啦，我希望我哋做到。」

至於今仗差點大演帽子戲法的伊高沙托尼則稱：「當然覺得可惜，亦有啲唔夠運，今次係我第一次喺香港射失12碼。如果教練下次依然畀機會我射12碼，我會再射，完全無問題！」

航源FC主教練陳永盛賽後表示，滿意球隊今場表現：「大埔上半場的攻勢十分銳利，2個失球後我們馬上作出調整，球員適應後馬上便追回1球。下半場我們有幾個機會可以把比分扳平，但我們沒有好好把握，結果再給對方進球。即使如此，個別球員的努力是明顯的。」他續指未來回到主場作戰的目標是取勝，雖然不容易，但仍會想盡辦法爭取3分。