《彩報》豪裝，入市即贏！撳撳呢條Link，寶藏等你拎：http://win.on.cc/football/　

德甲老牌勁旅史浩克04今季戰績下滑，兼夾麻煩不少，近日又有首席射手賓達納惹麻煩，5個星期內第2次被判罰下放去U23跟操。至於佢衰乜？絕對係「鑊鑊新鮮鑊鑊金」，最新呢次係衰逃學呀！

現年24歲嘅賓達納喺法國出生，踢過法國U19代表隊，但最終選擇代表阿爾及利亞，出戰過2014世界盃。2012年佢加盟熱刺，之後到2016年被外借去史浩克，一年後佢仲因為表現出色被史浩克買斷，依家仲獲分配着起10號波衫，今季仲已經入咗8球添。雖然話佢表現唔曳，只可惜紀律方面就認真麻麻，話說佢5星期前就因為對RB萊比鍚場波，唔肯以後備身份入場，之後被球隊罰佢落U23跟操。

之後3星期佢因為喺U23表現良好，嚟到本月初終於被重召返一隊。可惜好景不常，上星期賓納達又喺練波期間同隊友沙利夫辛尼開拖，然後到今個星期，佢又冇跟球會安排去上外援都要返嘅德文堂，麻煩多多之下，球會又決定罰佢落U23，希望佢今次真係知驚，會做番好啦！不過球會就慘，依家仲打緊護級戰，少咗佢點都有多少麻煩嘅！