【有片】史上最串12碼　引爆全球爭拗

《彩報》豪裝，入市即贏！撳撳呢條Link，寶藏等你拎：http://win.on.cc/football/　

一講起射12碼射得招積串咀，大家都會諗起所謂嘅「Panenka」射法，即係主射球員趁對方門將捉錯路，將個波chip起慢慢笠入龍門，近代名將好似施丹、托迪同伊巴謙莫域都曾經喺大賽期間施展，只可以講話藝高人膽大。不過，經過尋日澳職布里斯班獅吼對阿德萊德聯場波，獅吼嘅法國中場包菲迪一腳妙絕「慢流中袋」射法，以後講到史上最串12碼，仲唔係佢？

話說場波當時踢成2比2，獅吼就獲得一記12碼，主射嘅包菲迪走到埋去起腳，對手門將保羅艾素已經捉路撲去自己右邊，呢個時候包菲迪就突然忍住度力，輕力熨去龍門正中，然後失位兼失平衡嘅保羅艾素就只能睇住個波龜速喺身邊入網。

雖然最後場波就由阿德萊德聯反勝5比3，不過呢腳12碼就事後成為全球球壇熱話，有球迷話包菲迪踢得太串，唔尊重對手，又有球迷話佢其實係想射「Panenka」12碼，只係失手咁話。究竟佢係有心定無意？以後有冇球員夠膽模仿？大家又點睇呢？