加里夫巴利搞過乜？西媒逼施丹全面封殺

皇家馬德里尋晚喺西甲輸波，戰績繼續差，連回巢接手嘅施丹都話搞唔掂，鬧完班球員再公開道歉。照計輸波就係全體責任，不過近月一直同球會及當地傳媒關係麻麻嘅加里夫巴利，賽後又成為狙擊對象。今次「大聖爺」因為完場之後直接離隊，自己揸車走人，就即刻畀當地媒體擺上枱。雖然皇馬方面堅稱加里夫巴利嘅行動係得到會方批准，但西媒就不斷針對佢嚟大鬧，甚至有傳媒要求皇馬將佢徹底封殺，使唔使咁狠呀！

根據《馬卡報》同《阿斯報》報道，「大聖爺」喺輸波之後，都曾經上過隊巴，仲按傳統拎咗啲食物，但轉頭就落番車，坐自己車走，而未有跟大隊返巴拿貝基地利解散。雖然話「銀河艦隊」本身都話會由賽後開始，放假到星期三先再練，不過「大聖爺」離隊玩自我做法始終備受批評，《馬卡報》仲話巴利其實係直去機場，因為嗰度已經有私人飛機等緊佢，擺明係插佢掛住去玩或趕去商業活動搵錢，而放棄晒團隊精神咁話。

《阿斯報》之後嘅報道仲激，佢哋公開對「大聖爺」提出質疑：「皇馬畀間巴利出場，明顯係想幫佢托番高價，但可惜係依家巴利每踢多一場，身體又再跌一截。如果皇馬仲想將佢賣錢，不過全面封殺佢算數啦！」至於施丹本人對於「大聖爺」意見，似乎係唔多想理佢喎：「我唔知呀，你哋去問佢啦！」連施丹都頂佢唔順，下季睇怕都好難再喺巴拿貝見到加里夫巴利呀！

《彩報》豪裝，入市即贏！撳撳呢條Link，寶藏等你拎：http://win.on.cc/football/