黐線英冠搞邊科?成隊企喺度畀人入波!

2019年04月29日 19:28
東網電視
更多新聞短片
維拉入波時,列斯聯(白衫)十人企晒喺度!(互聯網)

列斯聯爭緊升班,但領隊比爾沙一個決定,或會毀掉球隊英超夢!今輪英冠發生罕見戲劇性事件,列斯聯作客阿士東維拉,下半場維拉球員倒下,主隊成班球員以為列斯球員會將個波踢出界外,但後者冇咁做反而射個波入網,維拉球員躁爆雙方發生衝突。之後比爾沙婦人之仁,命令維拉中圈開波之後不得防守,主隊遂即時入波扳平。最後列斯因此痛失2分,已將直接升班資格雙手奉送錫菲聯,引發超大爭議!

事件發生於73分鐘,維拉前鋒莊拿芬高查於中圈附近被對手踢跌,之後痛極倒地,一班維拉球員開始示意客軍,要將個波踢出界外,等軍醫入場治理其傷勢。不過列斯球員冇咁做,個波輾轉去到左路,基列治引球殺入禁區射入,列斯聯因此打開紀錄。

維拉球員之後好激動,圍住基列治郁手郁腳,雙方球員亦因此講手,而維拉後備席包括教練泰利,亦同比爾沙作出激烈爭論。比爾沙亦覺得己隊咁做並不道德,決定落柯打叫球員於對手中圈開波企定不作防守,全隊10名球員都照做,但邦圖斯贊臣就嬲到爆決定防守,但最終因為連門將都已放棄,所以艾度馬照樣射入,雙方於爭議聲下打成1:1完場。

英冠依家只餘1場聯賽,列斯失分之下,錫菲聯已穩奪聯賽亞軍取得升上英超席位。雖然今仗列斯就算勝出,但亦將因得失球差爭太遠,九成九上唔到次席,但球隊咁樣眼白白畀對手得分,陣中球員邦圖斯贊臣已經非常唔贊成,亦難保影響其他球員士氣。

今場賽事後,有唔少評論讚比爾沙有體育精神,但亦有唔少持相反意見。名哨卡頓保就話,因為莊拿芬高查並唔係頭部受傷,球證亦冇因此吹停賽事,維拉希望對手將個波踢出界只係一廂情願諗法,列斯聯照攻完全冇問題。而維拉名宿桑達斯亦話,維拉根本唔應該停晒手腳、去叫對手停止攻門,呢個係極其不智嘅做法。

《彩報》豪裝,入市即贏!撳撳呢條Link,寶藏等你拎:
http://win.on.cc/football/