【足動校園】和富大埔點只教踢波

隨着上周六（4日）和富大埔擊敗富力R&F，本屆「中銀人壽香港超級聯賽」王者寶座正式由和富大埔登上。大埔不少球員如黃威、梁冠聰等跟隨主教練李志堅多年，足證青訓重要性。競逐聯賽冠軍的同時，球隊4月25日更參與「中銀香港足動校園體驗計劃」，與來自港九街坊婦女會孫方中小學的小球員交流，藉此推動本地足運發展。　圖/文：陳焌鏗

是次校訪和富大埔派出助教呂志興，球員哈利、李家豪、黃祖心、錢兆琛出席。活動以簡單控球、盤球作引子，繼而以運送雪糕筒小遊戲測試訓練成果，還進行了多場分隊賽。活動過後，一眾大埔職球員派發紀念品予出席活動的小學生，人人有份，永不落空，相信一班小球員都滿載而歸！

不僅小朋友，連大埔職球員都十分享受這次活動。於分隊賽中獨取5球的李家豪表示：「自己第一次去校訪，初時都有啲緊張，去完覺得好好玩！估唔到啲小朋友都玩得咁投入！」呂志興亦透露孫方中小學有不少大埔青年軍，和富大埔管理主任葉佳更是該校足球班教練！呂志興說：「同小朋友玩、踢波係好開心嘅事，因為見到佢哋好享受、好投入。今次活動可以畀小朋友同球員交流，等佢哋感受吓我哋嘅傳波同企位。」

至於哈利則認為校訪有利足運發展：「今次好開心嚟到大埔嘅小學，我認為走入社區係一件好重要嘅事，同小朋友一齊踢波真係好開心，唔單止對大埔，對全香港嘅足運發展都好有幫助，透過呢啲活動，可以提升佢哋對足球嘅興趣，亦令佢哋愛上比賽嘅感覺。」他又謂：「當我仲係小朋友嘅時候，每次午膳時間我都走去踢波，如果你鍾意踢，你會成日想踢，當你愈踢愈多嘅時候，技術就會愈嚟愈好。即使年紀細，你都要對自己有信心，唔需要恐懼，唔好驚犯錯，要展示自己最好嘅一面畀人睇！」

港九街坊婦女會孫方中小學貫徹校訓「勤、廉、信、慎」來培育學生。勤，即積極、認真的做事態度；廉，即簡樸、廉潔的生活態度。信，即以誠、以信去對待別人；慎，即慎言、慎行的處事態度。

當日全程在旁支持一眾小朋友的馬惠貞副校長大讚是次活動：「今次我見到球員嘅熱誠，小朋友可以向球員學習技術、毅力，學識點去投入體育運動。我哋學校有個關於運動嘅口號，就係：『運動帶來健康與智慧』，透過運動可以畀小朋友學點同人溝通、相處，同時憑藉挑戰學到堅毅嘅精神。」