歐聯奇迹2.0！熱刺神奇逆轉阿積士入決賽

即睇全場入球：https://bit.ly/2WrXYe2　

繼利物浦完成歐聯大逆轉後，熱刺又創出奇迹，憑盧卡斯莫拉補時帽子戲法反勝對手3:2，總比數打成3:3下，憑較多作客入球殺入決賽！阿積士上半場攻入2球，總比數一度領先3:0，勢估唔到換邊後熱刺大反擊，鋒將盧卡斯莫拉轟入3球帶領球隊由出局變晉級，今仗嘅傳奇程度，絕對不下於紅軍淘汰巴塞！

阿積士首回合贏1:0，次回合返到主場信心爆棚，球隊5分鐘就打開紀錄，隊長馬菲斯迪歷特擺脫捷比亞，接應角球力壓迪利阿里頂入，總比數贏到2:0。熱刺之後傾力反撲，今仗復出嘅孫興民勁活躍，6分鐘左路狂爆落底線，左腳一出中近柱彈出，基斯甸艾歷臣未能補中，之後老孫兩番施射都未能入波。

阿積士之後攞番主動權，杜辛泰迪治左路窄角度勁射柱邊斜出，到35分鐘終於拉開比數，迪莊妙傳左路，杜辛泰迪治地波橫傳，薛耶治左腳抽遠柱入網，半場主隊贏到2:0。

換邊後熱刺展開大反擊，53分鈕鐘艾歷臣左路世界級傳遠柱，迪利阿里第一時間抽射，但門將守到近柱擋出，但2分鐘後終於入波，路斯大腳送前反擊，阿里扭過迪莊，盧卡斯莫拉壓入禁區射入。熱刺趁對手陣腳未企穩，4分鐘後孫興民送捷比亞落底線傳中，洛蘭迪近門一射被門將奧拿拿擋出，但奧拿拿竟同舒奧尼炒埋一碟，盧卡斯莫拉偷番個波，於人叢中左腳抽入，短短時間內梅開二度，追成2:2平手。

之後雙方鬥攻，79分鐘薛耶治禁區外左腳抽地波中柱，87分鐘熱刺出現黃金機會，維頓漢近門一頭一腳埋門，先中柱之後被護空門，戲劇性場面於補時出現，莫拉接應阿里妙傳左腳抽成3:2完場，憑作客入球優惠出線，將同利物浦組成歐聯全英決賽！