巴塞誓踢古天奴返英超　利物浦變大輸家！

港網 No.1 24小時足球賠率：https://bit.ly/2UmNL0L　

法國前鋒基沙文將會轉投巴塞隆拿，已經成為公開嘅秘密，向來着開7號波衫嘅基沙文，喺新球會好大機會繼續着佢嘅招牌Number 7，意味目前呢件巴塞隆拿波衫嘅主人菲臘比古天奴將冇碇企！英國多間傳媒爆料，古天奴重返英超機會頗高，而且曼聯同車路士都準備「接貨」。

報道指車路士係最有誠意嘅一隊，「藍戰士」視古天奴為夏薩特(傳聞將投皇馬)嘅接班人，不過轉會大前提係佢哋成功推翻或者延遲今個夏天展開嘅「轉會禁制令」，如果車路士最終未能成事，曼聯就有機會爬頭成為古天奴爭奪戰領先者，「紅魔鬼」希望以呢單王牌收購作為復興曼聯嘅標誌。

事實上，古天奴喺巴塞隆拿嘅表現未能令球隊同球迷滿意，當基沙文同法蘭基迪莊加盟後，佢要做正選就更加困難，而呢位巴西球星今夏回歸英超嘅話，大輸家竟然係利物浦！唔係話利物浦會驚古天奴倒戈，而係話古天奴連累利物浦唔見2,500萬歐元。

西班牙《世界體育報》爆料，巴塞隆拿上年用1.42億歐元收購古天奴，當中有3,600萬歐元係附加條款，要等到某啲指定情況實現先至要畀錢，可惜入面大部份都未有實現，例如巴塞隆拿贏歐聯(500萬歐元)以及古天奴為巴塞隆拿上陣100次(2,000萬歐元)，但佢依家只係上陣過74次，如果就咁賣走，「紅軍」就見財化水。