手掌係肉左手係肉　林柏特毀咗列斯英超夢

港網 No.1 24小時足球賠率：https://bit.ly/2UmNL0L　

正如前樂壇天王黎明所講：「手掌係肉，左手都係肉」，好多時好多嘢，都唔一定可以做到二揀一咁簡單！就好似今季英冠升班附加賽，今晨上演嘅四強戰次回合，由列斯聯對打比郡，其中列斯聯當年由基維爾、保耶同活基治等爆出嘅青春風暴，幫佢哋贏到勁多球迷，今次有機會見到佢哋重返英超，當然勁多球迷支持。至於打比郡則係由前車路士名將林柏特帶領，「林伯」又係一向多Fans，老實講，最好梗係兩隊一齊上英超，球迷就最開心。

不過，現實邊有咁美好，兩隊波係升班附加賽4強已經撞到正，首回合列斯聯贏1比0，到今晨次回合，列斯聯25分鐘就由史超活達拉斯入波領先，將總比數拉開到2比0，以為入決賽十拿九穩啦！點知完半場前，打比郡個中場杜尼賀姆斯傷出，反而令佢哋因禍得福，事關入替嘅積克馬利諾，落場1分鐘就為打比郡扳平。

換邊之後，打比郡喺47同58分鐘分別由美臣蒙特同哈利威爾遜建功，反超前3比1。然後到列斯聯喺62分鐘才由史超活達拉斯射入個人今場第2球，將比賽追番到2比3。只係打比郡個後備殺手積克馬利諾，去到85分鐘趁住打多一人優勢，再入一球，為打比郡鎖定4比2戰果，就算補時連打比郡都有球員被逐，仍然贏4比2完場，兩回合計贏4比3，打入升班附加賽決賽。

打比郡贏波，令到全球列斯聯迷只有失望離場。好彩係其他「林伯」迷就仲有機會，睇吓下季係咪睇到佢領軍風采。「林伯」賽後話滿意今場賽果，但決賽鬥維拉唔易打。」查實就算最終打比郡功虧一簣，大家都未必見唔到佢喺英超教波，事關近日有傳「林伯」嘅前東家車路士，嚟緊有意辭退主帥沙利，仲會對「林伯」打主意添！點都好，依家最緊要都係睇埋5月27日場英冠升班附加賽決賽，到時先再諗其他啦！