公鹿屠龍 一節搞掂啦！
20190516
東網電視
更多新聞短片
(美聯社圖片)
NBA東岸決賽今晨開打，之前得到充份休息嘅公鹿，面對住同76人打完激戰「搶7」後嘅速龍，頭3節都未算完全入局，只能做隻沉默的公鹿，以落後速龍7分形勢進入第4節。不過，以聯盟最佳常規賽成績打入季後賽嘅佢哋，始終係有真材實料，嚟到第4節，成隊波攻防都脫胎換骨，包括喺比賽尾段逼令速龍連炒最後8次投射，打出一個「10比0」走勢，結果公鹿在第4節打出32比17，最終主場以108比100反勝速龍，先贏一場。
「字母哥」安迪杜甘普今場繼續一貫全能發揮，交出24分、14籃板、6助攻、2偷波同3封籃，成為贏波英雄。不過同樣要讚，仲有佢公鹿隊友布克盧比斯，打出個人季後賽新高嘅29分，當中包括喺第4節嘅13分，將速龍摧毀。
其實今場速龍表現都唔失禮，首席球星李安納都攻入31分，就連路維都打出爭氣波射入7球「3分波」，最終都有31分，只係其餘隊友唔太爭氣，尤其喺第4節，其他隊友合共15射0中，先至出現畀公鹿單節翻盤情況，錯過喺公鹿主場偷番場勝仗機會。
次回合繼續由公鹿主場，會喺香港時間周六上演，速龍真係要更努力，否則隨時又畀公鹿咬傷。
今日戰果 （前者主場）
公鹿 108:100 速龍(公鹿領先1:0)
支持本地運動員，一齊去「睇體」！
東網體育FB同你追實體壇每個精彩時刻！