【港超專版】Calvin柔+Ricky剛=最佳拍檔

20190516
東網電視
更多新聞短片
當日營運公民時,貝可泓曾引入多位具質素的外援,獲球迷封「FM(Football Manager)貝」美譽。
目前排聯賽榜第3的冠忠南區,今季表現大有進步,除有機會成為聯賽亞軍之外,早前更打入足總盃決賽,有望奪得球隊重返頂級聯賽後首個冠軍獎盃。這一切,球員固然功不可沒,但教練團成員亦應記一功,當中今季新加入球隊並擔任助教的貝可泓(Calvin)強調,協助球員保持良好心態比任何戰術重要!
圖/文:陳焌鏗
闊別本地頂級聯賽5年,這位身兼港甲球會公民的行政總監表示,回歸全因冠忠南區主教練鄭兆聰(Ricky):「本身有留意香港足球,之前我做評述員,冇做之後時間相對鬆動咗。我同Ricky熟,佢覺得我幫到手,於是問我有冇興趣加入球會。本身幾鍾意冠忠南區呢隊波,佢哋嘅模式同之前公民有啲相似,都係好有心、組織得唔錯嘅球隊。既然時間啱,理念相近,又有好多好似謝德謙、沈國輝嘅老拍檔,所以好快就應承咗Ricky。」
Calvin更以「一剛一柔」來形容自己和「Ricky Sir」的伙伴關係:「我係一個『柔』啲嘅教練,着重點去令球員交出最好表現、將所有潛質發揮出嚟,同埋每場比賽落足力。我覺得就算有幾好嘅戰術,球員唔用心踢,又或者心態唔係咁好嘅時候,都唔會踢到應有水準。」
他續說:「除咗操練、比賽之外,球員場外都會面對唔同嘅問題,有時會有少少失落同迷惘,導致有時做得唔好,我同部分球員熟絡,而且比較擅長同佢哋溝通,所以我嘅角色可以話係主教練同球員嘅橋樑,呢方面幫到Ricky手。」
今季在南區與昔日戰友謝德謙、沈國輝再次聚首,Calvin笑言:「同『阿謙』、『阿輝』夾咗好多季,傾傾吓偈都會講番以前啲嘢,例如『阿輝』以前喺公民成日入波喎,我哋會笑佢點解上季冇乜波入,今季助攻又唔多,我哋想佢多啲入波、助攻,睇吓有冇機會喺呢方面做好啲,幫幫球隊手!」
「FM貝」:搵啱外援咪亂換
當日營運公民時,貝可泓曾引入多位具質素的外援,獲球迷封「FM(Football Manager)貝」美譽。問及當中的成功之道時,他認為關鍵在於耐性:「公民班費相對少,唔可以搵完一個外援返嚟,唔啱用就即刻換,所以有時啲外援同我哋諗法唔同,但見佢能力唔太差,就算初嚟香港發揮得唔太好,都會畀機會佢,睇吓季內會唔會進步。」
談到印象最深刻的外援,Calvin透露:「保連奴(即富力R&F翼鋒福保羅)同艾里奧!兩個都係2007年12月嚟香港,都算係我哋早期嘅巴西外援,佢哋嚟到嗰陣都係20出頭,初初都唔係好適應香港,好多人唔睇好佢哋,但踢吓踢吓有好大進步,之後成為長期好幫手。」