洛賓列貝利最後致敬　億歐收購超勁接班人

收看直播，請按東網APP頂部的直播ICON；或按以下直播Link：http://tv.on.cc/live　

本季德甲最後一輪，將於周六晚上上演，拜仁於煞科一戰主場鬥法蘭克福，只要唔輸就攞冠軍，完成德甲7連霸。拜仁雙翼列貝利同洛賓，將於今夏雙雙離開球隊，可謂一個時代嘅終結，今場係佢哋最後一次以球員身份為拜仁征戰，東網將直播呢場大戰，而仲有得爭聯賽冠軍嘅多蒙特，今輪會作客慕遜加柏，兩場大波都喺晚上9時30分上演，東網2場都有得睇。

列貝利同洛賓，分別已36及35歲，佢哋先後於07及09年加盟球隊，分別奪得8次及7次德甲錦標，佢哋13年雙劍合壁，勇奪歐聯冠軍。兩大元老為拜仁於聯賽合共落場472次，轟入183球，可謂近代拜仁最強翼鋒組合。雖然本季二人於球隊已非正選，不過仍然非常重要，深得隊友同球迷尊重，今次終極一戰，球迷都希望拜仁早早奠定勝局，讓領隊尼高高華可以派佢哋後備落場，畀球迷欣賞佢哋嘅最後英姿，致以最崇高致意。

拜仁陣中已有基拿比同京士利高文等接班人，不過拜仁今夏，將出1億歐元收購曼城德國翼鋒利萊辛尼，讓球隊可以再度挑戰歐聯冠軍。洛賓對利萊辛尼讚不絕口，認為佢係當今球壇其中一個實力最強翼鋒，極希望拜仁可以羅致呢名猛將。另外亦有傳拜仁睇中阿積士薛耶治，呢名摩洛哥好波之人本屆歐聯踢到曉飛，若拜仁可以買到，攻力肯定勁有睇頭。

港網 No.1 24小時足球賠率：https://bit.ly/2UmNL0L