阿里基官宣離隊 祖雲達斯誓請英超名帥!

2019年05月17日 19:59
東網電視
更多新聞短片
(Getty Images)

祖雲達斯宣布,領隊阿里基將於本季完結後離開,「斑馬兵團」將會力邀熱刺主帥普捷天奴揸旗!阿里基帶領祖雲達斯5季,全部取得意甲冠軍,加上4個意大利盃錦標,阿里基戰績可以用完美嚟形容,但極可能因為本屆歐聯8強止步,令祖記高層決定同佢分道揚鑣。

祖雲達斯剛於官網證實,阿里基會於季尾離開:「於19/20年球季,阿里基將唔再係祖雲達斯主帥。於意大利時間5月18日,阿里基將會同主席安迪亞阿尼利一齊見記者。」於球會官方聲明之中,並冇交代阿里基離開原因,但一般相信,球會係見於歐聯戰績未能更進一步,而萌生換帥念頭。

阿里基於15及17年,分別帶領祖記殺入歐聯決賽,但最後都功虧一簣僅得亞軍。本季球隊簽入剛連攞3次歐聯錦標嘅C朗,就係希望染指該項重要錦標,但卻於8強不敵阿積士出局,相信呢個係阿里基死因。

熱刺領隊普捷天奴,本季於未有買入任何球員嘅情況下,先後淘汰曼城及阿積士殺入歐聯決賽,令祖雲達斯對佢極度欣賞,故有傳「斑馬兵團」將不惜一切代價,力邀呢位名帥過檔。